80వ స్వాతంత్ర్య దినోత్సవ వేడుకలు సందర్భంగా అల్లూరి జిల్లా కలెక్టర్ టి. నిశాంతి చేతుల మీదుగా గూడెం కొత్త వీధి తహసిల్దార్ హనుమంతు అన్నాజీ రావు గారు ఉత్తమ పురస్కారాన్ని అందుకున్నారు. విస్తీర్ణంలో అత్యంత పెద్దదైన గూడెం కొత్త వీధి మండలంలో ఆయన అందిస్తున్న సమర్థవంతమైన సేవలకు గుర్తింపుగా ఈ పురస్కారం లభించింది.
మండలంలో భూముల రీ-సర్వే కార్యక్రమం విజయవంతంగా చేపట్టడం, అర్హులైన రైతులు మరియు పేదలకు భూమి పట్టాలు పంపిణీ చేయడం, అలాగే దీర్ఘకాలిక భూవివాదాలను ఎప్పటికప్పుడు పరిష్కరించడంలో ఆయన ప్రత్యేక ప్రతిభ కనబరిచారు. ఓటరు జాబితా ప్రత్యేక సమగ్ర సవరణ ప్రక్రియను కూడా ఎంతో పారదర్శకంగా మరియు బాధ్యతాయుతంగా నిర్వహించారు.
గిరిజన ప్రాంతమైన ఈ మండలంలో ప్రజల సమస్యలను ఎప్పుడూ స్వయంగా పరిశీలిస్తూ, స్థానిక ప్రజలకు నిత్యం అందుబాటులో ఉంటూ అంకితభావంతో సేవలు అందిస్తున్న తహసిల్దార్ అన్నాజీ రావు గారి పనితీరుపై సర్వత్రా ప్రశంసలు వ్యక్తమవుతున్నాయి. ఆయన ప్రతిభకు తగిన గుర్తింపు లభించడం పట్ల పలువురు అధికారులు, స్థానిక ప్రజలు హర్షం వ్యక్తం చేస్తూ శుభాకాంక్షలు తెలిపారు.
0 Comments