స్థానిక ఏరియా ఆస్పత్రిలో కోవిడ్-19 పరీక్ష కేంద్రం అందుబాటులోకి వచ్చింది. గురువారం సాయంత్రం నర్సీపట్నం ఎమ్మెల్యే పెట్ల ఉమాశంకర్ గణేష్ ప్రారంభించారు. వివరాల్లోకి వెళితే..నర్సీపట్నంలో రెండు కరోనా వైరస్ పాజిటివ్ లు రావడంతో పట్టణం పరిధి లో 23, 24, 25 వార్డులను కంటయింమెంట్ జోన్ గా ప్రభుత్వం ప్రకటించింది. అలాగే రాష్ట్ర ప్రభుత్వం కరోనా వైరస్ పరీక్షలను విస్తృతంగా నిర్వహించాలన్న లక్ష్యంతో పలు ఆసుపత్రులకు ల్యాబ్ లను సమకూర్చింది. ఈ మేరకు గ్రామీణ జిల్లాలో అనకాపల్లి, నర్సీపట్నం ఆస్పత్రుల్లో ల్యాబ్ లను వైద్య ఆరోగ్య శాఖ అధికారులుఏర్పాటు చేశారు. నర్సీపట్నం ఏరియా ఆస్పత్రిలో ఏర్పాటుచేసిన కోవిడ్-19 పరీక్ష కేంద్రాన్ని ఎమ్మెల్యే పెట్ల ఉమాశంకర్ గణేష్ ప్రారంభించి వినియోగంలోకి తీసుకొని వచ్చారు. 
ఈ సందర్భంగా ఎమ్మెల్యే విలేకరులతో మాట్లాడుతూ నర్సీపట్నం పరిధిలోనున్న ఐదు ప్రాథమిక ఆరోగ్య కేంద్రాల్లో కరోనా వైరస్ లక్షణాలు కనిపించిన వెంటనే పరీక్షలు నిర్వహించేందుకు అనువుగా ప్రభుత్వం ఈ ల్యాబ్ ని ఏర్పాటు చేయడం జరిగిందన్నారు. ల్యాబ్ లో మూడు పరికరాలు అందుబాటులో ఉన్నాయని, ఒక నమూనా పరీక్షించేందుకు గంట సమయం పడుతుందని, ఈ నేపథ్యంలో ప్రతిరోజు 50 పరీక్షలు నిర్వహించే అవకాశం ఉందని వైద్యులు చెబుతున్నారని ఎమ్మెల్యే అన్నారు. తొలుత నర్సీపట్నంలో కంటయింమెంట్ జోన్ గా ప్రకటించిన ప్రాంత ప్రజలకు, ఆయా ప్రాంతాల్లో విధులు నిర్వహిస్తున్న పారిశుద్ధ్య కార్మికులు, పోలీసులకు ఇతర సిబ్బందికి పరీక్షలు నిర్వహించేందుకు ప్రాధాన్యం ఇస్తామని అన్నారు. ఏరియా ఆసుపత్రి పరీక్ష కేంద్రాల్లో కరోనా వైరస్ పాజిటివ్ వస్తే నమూనాను కేజీహెచ్ కి పంపించి మరోసారి పరీక్ష నిర్వహించడం జరుగుతుందన్నారు.
0 Comments